АЗ НЕКОН БОҒ

Қосим Ҳакимзода дар баробари дар вазифаҳои пурмасъулияти ҷамъиятиву сиёсӣ кор кардан, падари мушфиқу ғамхор, шавҳари содиқу вафодор низ будааст. Ў дар тарбияи ҳафт фарзанди хеш ҳеҷ гоҳ бетаваҷҷуҳӣ зоҳир накарда, балки онҳоро дар руҳияи ватандўстӣ, вафодор будан ба арзишҳои миллӣ ва ифтихор кардан аз меҳани худ ба камол расондааст. Аз чунин падари намунаи даврон фарзандоне ба воя расидаанд, ки мисли падари хеш дар ободонии ёру диёр, ватани гулгулшукуфонамон саҳми хешро гузоштаанд.

Яке аз онҳо дастпарвари мактаби миёнаи рақами 14 – и шаҳри Сталинобод (Душанбеи имрўза) ва бахши русии факултети таъриху филологияи УДТ ба номи В. И. Ленин (ҳоло ДМТ), айни замон номзади илми сиёсӣ, дотсенти кафедраи фалсафаи Донишгоҳи аграрии Тоҷикистон ба номи Шириншоҳ Шоҳтемур Севар Ҳакимзода мебошанд, ки собиқаи кории панҷоҳсола доранд. Он кас дар баробари таълими шогирдон ба корҳои илмӣ низ машғул гардида, муаллифи баштар аз 30 таълифоти илмианд.

Мо дар оилаамон ҳафт нафар ба воя расидаем, солҳои наврасиву ҷавониашонро ба ёд оварда мегўяд С. Ҳакимзода. – Ҳамеша ба он кўшидаем, ки номи падари бузургворамонро нек нигоҳ дорем. Албатта, падарам ба корҳои идоравӣ бештар банд буданд ва модарамон моро ҳамеша таъкид мекарданд, ки мабодо аз обруву эътибори қиблагоҳамон сўиистифода бурда, ўро сархам намоем. Ва дар оила вақте сарҷамъ меомадем, падарамон ҳар кадомамонро бо меҳр ба оғуш гирифта дўстдорӣ мекарданду мегуфтанд, ки ман аз фарзандонам боварии комил дорам, онҳо бояд хуб хонанду соҳиби илму маърифат гарданд. Ҳамин боварии падарамон ба мо руҳ мебахшид.

Чунонки муаллима С. Ҳакимзода зимни суҳбат иброз доштанд, аз нусхаи падар (аз ҳафт нафар – ду духтар ва панҷ писар) танҳо худи ў боқӣ мондааст. Хоҳарбузургашон – София Ҳакимова низ омўзгори муваффақ будаанд ва то охири ҳаёташон директори мактаби миёнаи рақами 50 – и шаҳри Душанбе шуда кор кардаанд. Дигар бародарон низ дар вазифаҳои пурмасъул кор карда, соҳиби обрўву эҳтироми атрофиён гардида, ному шарафи падари бузургворашонро зинда нигоҳ доштаанд.

Воқеан ҳам, ҳама чиз ба сарвари хонадон вобаста аст. Қосим Ҳакимзода тавонистаанд, ки дар давоми ҳаёти хеш ҳам масъулияти бузурги давлтиро бар дўш дошта бошанд, дар баробари ин, оилаи намунавиро ташкил диҳанд. Соҳаи фарҳанги ҷумҳурӣ бо ному пайкори ин абармарди соҳа ифтихор дорад. Маҳз хизматҳои шоёнаш дар вазифаҳои иҷрокардааш номи ўро ба таври ҷовидонӣ зинда нигоҳ медорад.