Чӣ ғам дорам...

Зи шарми рӯйи Ҳақ рангинқабо дорам, чӣ ғам дорам,

Ба рӯҳи хеш аз ёдаш ғизо дорам, чӣ ғам дорам.

Зи ҳилму аз ҳаёву тоату бедорхобиҳо

Сипарҳое алорағми бало дорам, чӣ ғам дорам.

Тамоми дарди олам бар вуҷудам ҳамлавар гардад,

Ба ҳар дардам зи лутфи Ҳақ даво дорам, чӣ ғам дорам.

Дилам чун бишканад, ғам нест, меҳраш мекунад дармон,

Зи меҳраш бар дили худ мӯмиё дорам, чӣ ғам дорам.

Ба хоби хеш бинам кардаву нокардаҳоямро,

Чунин оинаи гетинамо дорам, чӣ ғам дорам.

Наметарсам, ки нур аз чашми ман ногаҳ шавад маъдум,

Зи хоки кӯйи Ӯ бар дидаи худ тӯтиё дорам, чӣ ғам дорам.

Қиёмат мешавад наздику аммо хотирам ҷамъ аст,

Шафеъи рӯзи маҳшар- Мустафо дорам, чӣ ғам дорам.

Маро дастур Қуръону ҳадису панди пирон аст,

Сабақҳо аз азизу авлиё дорам, чӣ ғам дорам.

На касро мекунам ёду на кас ҳам мекунад ёдам,

Ба ҷои қаср кунҷи инзиво дорам, чӣ ғам дорам.

Наменолад кунун аз бекасиҳо Равшани Ҳамроҳ,

Дар ин дунёву он дунё Худо дорам, чӣ ғам дорам.

Равшани_Ҳамроҳ