Аз дур ё наздик: Маълум шуд, ки шаҳрвандони кадом кишварҳо бештар ба Тоҷикистон меоянд

Давоми шаш моҳи соли равон ба тоҷикистон беш аз 1 миллион шаҳрванди хориҷӣ ворид шудааст, ки аз он наздик ба 900 ҳазор нафараш ба ҳайси сайёҳ ворид шудааст

Дар нимсолаи якуми соли 2026 ба Тоҷикистон 889,4 ҳазор сайёҳ ворид шудааст.

Дар ин бора имрӯз зимни нишасти матбуотӣ раиси Кумитаи рушди сайёҳии Тоҷикистон Ҷамшед Ҷумахонзода хабар дод.

Ба гуфтаи вай шумораи сайёҳоне, ки дар нимаи аввали соли 2026 ба Тоҷикистон ташриф оварданд, 16,7% афзоиш ёфтааст.

Ба гуфтаи вай, дар ин давра аз 1 миллиону 63,4 ҳазор шаҳрванди хориҷие, ки ба Тоҷикистон ташриф овардаанд, 889,4 ҳазор нафар ба ҳайси сайёҳ арзёбӣ мешаванд.

"Ин нишондиҳанда нисбат ба ҳамин давраи соли гузашта 16,7 фоиз зиёд мебошад”, - гуфт ӯ.

Таъкид шуд, ки аз шумораи умумии сайёҳон 806,9 ҳазор нафар аз кишварҳои Иттиҳоди Давлатҳои Мустақил (ИДМ) ва 82,5 ҳазор нафар аз давлатҳои хориҷи дур ба Тоҷикистон сафар кардаанд.

Ҳамчунин иттилоъ дода шуд, ки дар давраи ҳисоботӣ дар ҷумҳурӣ 216 ширкати сайёҳӣ фаъолият намудааст.

Кумитаи рушди сайёҳӣ афзоиши мунтазами ҷараёни сайёҳонро ба ҷумҳурӣ ба рушди инфрасохтори сайёҳӣ, таблиғи иқтидори сайёҳии миллӣ ва густариши ҳамкориҳои байналмилалӣ дар ин самт рабт медиҳад.