Ҷисми Асомиддин-падари Камолиддинро, ҷисми мурдаи аробакашҳои шарики Умар Ҳофизро ҳамчунин ба аробае, ки онро мудом Умар Ҳофиз меронд ва пешрави он буд, мебурданд. Мебурданд ҷониби маркази Исфара. Ва бо роҳе мебурданд, ки дар ёлаву саҳроҳои атрофи он ҳар баҳор мардумон лола мечиданд лоладарахт карда, ҷониби маркази Исфара мебурданд бо таронаҳои сара ва ҷангу чагона.

Аммо... Акнун...

Дар аробае, ки ҷисми Умар Ҳофизро мебурданд боз як каси дигар буд ва буд вай ҷисми Мирзо. Балки ин ягона ҷисми зинда буд болои ароба, дар паҳлӯи ҷисми мурдагон. Мирзои Навозанда, ки танаш хунолуд буд, дар паҳлӯи падархонди шаҳидшудаи худ менишаст ва чашм канда наметавонист аз вай, аз ин марди бузург ва беҳамто ва қатраҳои ашк мечакид ва мезахид ба рухсораи коҳида, ҳайратзада ва ғӯсабори кӯдаконаи вай...

---

Дар пояи Урдаи Исфара, яъне дар саҳни Чойхонаи Лола ба ҷойи суруду тантана саллоти ҷаноза аз нав баланд гардид.

Ҷисми Умар Ҳофизи бузургро паҳлӯи писараш ва зани дӯстдоштаи азизаш ба хок супорида буданд.

Барои ҷисми Асомиддин бошад паҳлӯи писараш Камолиддин гӯрхона канда буданд.

Аробакашҳои шаҳидшудаи дигарро ҳамчунин ба хок супориданд.

---

Баъд ҳама аз қабристон бадар рафта буданд ва ин ҷо монда буд фақат Қорӣ Носир ва Мирзои Навозанда.

Онҳо хомӯш менишастанд.