Бипурсид, к-ин паҳлавон бо сипоҳ
Кай омад аз Эрон бар ин размгоҳ?

995 Набуд огаҳе кас зи ҷанговарон,
Ки бугзашт аз ин сон сипоҳи гарон?

Кӣ бурд огаҳӣ назди он девзод,
Ки он ҷо Сиёвахш дорад нажод?

Агар хок будиш омўзгор,
Надидӣ ду чашми ман ин рўзгор.

Сипаҳрам бад-ў гуфт: «Осон будӣ
В-агар дил зи лашкар ҳаросон будӣ.

Яке Геви Гударз будасту бас,
Савор эч бо ў надидем кас.

1000 Сутўҳ омад аз ҷанги як тан сипоҳ,
Чунон рафт Геву Фарангису шоҳ.

Чу бишнид, ранги рухаш зард шуд,
Зи гардун дили ў пур аз дард шуд.

Варо дод посух, ки омад падид,
Сухан ҳар чӣ гўшам зи доно шунид,

Чу Яздон касеро кунад некбахт,
Абе кўшиш ўро расонад ба тахт».

Сипаҳбад чу гуфти Сипаҳрам шунид,
Сипоҳе ба пеш андаромад падид.

1005 Сипаҳдор Пирон ба пеш-андарун,
Сару рўю ёлаш ҳама пур зи хун.

Гумон бурд, к-ў Гевро ёфтаст,
Ба пирўзӣ аз пеш биштофтаст.

Чу наздиктар шуд, нигаҳ кард шоҳ,
Чунон хаста буд паҳлавони сипоҳ.

Варо дид баста ба зин-бар чу санг,
Ду дасташ паси пушт бо полаҳанг.

Бипурсиду з-ў монд андар шигифт,
Ғамӣ гашту андеша андаргирифт.

1010 Бад-ў гуфт Пирон, ки «Шери жиён,
На дарранда гургу на бабри баён,

Набошад чун ў дар сафи корзор,
Куҷо Гев танҳо буд, эй шаҳрёр.

Бар он сон, ки ў бардамад рўзи ҷанг,
Зи бимаш ба дарё бисўзад наҳанг.