---

Осмон ахтарнисор аз чашми мост,
Ин Замин шабзиндадор аз чашми мост.
Барф ранг аз чашми мо бигрифта буд,
Сабзрангии баҳор аз чашми мост.

---

Аз фироқи чашми ту бар сар хумор Ойинаро,
Чашм бикшо, субҳ шуд, магзор зор Ойинаро.
Эй хаёлат сабз, чашмат сабз, ҳарфат сабз Ёр,
Рӯбарӯ биншин, ки созӣ сабзазор Ойинаро.

---

Дар худ ватан намудаам, пас, беватан наям,
Рӯзе, ки беватан шавам, он рӯз ман наям!
Ҳар субҳу шом дар дилу рӯҳам ҷидолҳост,
Кӣ гуфт, к-аҳли машварат ё анҷуман наям?

---

Бо ту дар дил баҳорҳо дорам,
Бе ту аз дард борҳо дорам.
Пойи ман хорро наметарсад,
Аз ту дар дил чу хорҳо дорам.

---

Афтодам, афтодам, дар доме афтодам,
Ку дасте, ку дасте, то созад озодам?
Навмедам, навмедам, беҳосил чун бедам,
Дар шаш кам панҷоҳам чун як кам ҳафтодам.

---

Ман аз ин ҷой набудам, ки ба инҷо оям,
Мева овард ба ин ғамкада бо Ҳаввоям.