Ҳамдарди ман гар нестӣ, дармони дардамро мапурс,
Гар ҳамраҳи ман нестӣ, аз роҳдонӣ дам мазан!

---

Ойина аз ҷамолат аз баски об хўрда,
Бо пайкари латифат бас печутоб хўрда!
Ҷаъфар, ки масту махмур, уфтодааст маҳҷур,
Ё бодаи муҳаббат, ё шеъри ноб хўрда!

---

Эй сол, агар Соли навӣ, фардои моро зинда кун!
Бо ҳафриёти ҳирфаӣ дунёи моро зинда кун!
Ийсои мо дар мех шуд, нахли умед аз бех шуд,
Рӯҳе бидам дар ҷисми мо, Ийсои моро зинда кун!

---

Ғунча бандад дар гиребони надомат чокҳо,
Роз гӯяд бо забони бода бо ман токҳо.
Устухонҳои диламро гурги ҳиҷрон мехурад,
Қарс-қарсаш медиҳад дар гӯши ҷон пажвокҳо.

---

Аз сари шаб то саҳар хомӯш бо мо сӯхт шамъ,
Шоми ҳиҷронро ба нури яъси мо афрӯхт шамъ.
Бо садои бесадоӣ субҳро бедор кард,
Чун забони безабониро зи мо омӯхт шамъ.

---

Ҳамаро зи ёд бурдам: қаламу китобу дафтар,
Ва зи лавҳи дил сутурдам: қаламу китобу дафтар!
Чи расида аз мақолот? Ду-се ҳарза қилу қолот!
Ба ду дасти ту супурдам: қаламу китобу дафтар!