---

Аз замин кай ба фалак баргардам,
Одамам, кай ба малак баргардам?
Соатам чор шуду бедорам,
Соате деҳ, ки ба як баргардам.

---

Тақдир рақам зад, ки гирифтори ту бошам,
Дар орзуи лаъли шакарбори ту бошам.
Наққоши азал тарҳи ту он гуна биёрост,
То шому саҳар ташнаи дидори ту бошам.

---

Як дили пурдард дорам ғайри ту,
Ранги рӯйи зард дорам ғайри ту.
Ман чӣ дорам шоми ҳиҷрон, моҳи ман?
Моҳи дарёгард дорам ғайри ту.

---

Таҳорати бадан гуноҳи қалб чун шӯяд?
Гуноҳи қалбро таҳорати дарун шӯяд.
Дилам шикастаӣ, магар ту худ намедонӣ,
Ки шишаи шикаста дасту по ба хун шӯяд.

---

Ба дасте кӯзаву ба дасти дигар офтобаем,
Ҳама савори моҳу мо савораи аробаем.
Ба зери осмони бесаҳоб, дар фироқи об,
Ҳазорумин саҳобаи саҳобаи саҳобаем.

---

Гар ҳамдили ман нестӣ, аз ҳамзабонӣ дам мазан!
Гар нестӣ ҳаммаслакам, аз ҳамзамонӣ дам мазан!