---

Ғариби як садот шудам, намеоӣ,
Гадои як адот шудам, намеоӣ?
Зи ақлу ҳушу дину хирад, ки дар ман буд,
Тамом мосувот шудам, намеоӣ?

---

Гар нек ё бадам, Ҷаъфар Муҳаммадам,
Ибни Муҳаммадам, Ҷаъфар Муҳаммадам.
Эй, к-аз дафинаҳо ҷустӣ хазинаҳо,
Ман ганҷи сармадам, Ҷаъфар Муҳаммадам.

---

Ман, ки бо замзамаи нур фаро хонда шудам,
Пас, чаро инчунин афсурдаву дилмонда шудам?
Аз дари лутфи муназзаҳсифати поксиришт,
Ман, ки иблис набудам, зи чӣ пас ронда шудам?

---

Ман на бар рӯйи накӯ ошиқ шудам,
Не ба ҷоҳу обрӯ ошиқ шудам.
Мардум ар бар чанд сӯ ошиқ шуданд,
Ман ба бесӯйии сӯ ошиқ шудам.

---

Вақти он омад, ба обу ранги хеш,
Нақш созам бо сухан “Аржанг”-и хеш.
Рӯ ба даргоҳи сухан ё ҳу занам,
Сад ҷароҳат дар дилам аз ҷанги хеш.

---

Эй, ки пурсидӣ чӣ савғот зи роҳ овардам?
Нест ғайр аз дили савдозада роҳовардам!
Ман, ки аз дағдағаи фалсафаҳо безорам,
Дар дили мардуми чашми ту паноҳ овардам.