---

Қалам бозичаи савдои мо шуд,
Лабаш ҳамроз бо лабҳои мо шуд.
Ба ҷойи ёр бӯсидем то субҳ,
Қалам дар интиҳо Лайлои мо шуд.

---

Зи пушти Кӯҳи Қоф омад муҳаббат,
Зи қаъри қалби соф омад муҳаббат.
Зи чашм омад балоҳое, ки омад,
Зи айну шину қоф омад муҳаббат!

---

Муҳаббат дурру уммонаш дилам буд,
Муҳаббат атру райҳонаш дилам буд.
Дилам куллу муҳаббат ҷузве аз он,
Муҳаббат мулку султонаш дилам буд.

---

Дилам хуршеду анвораш – муҳаббат,
Дилам чун нуқта, паргораш – муҳаббат.
Дилам бемори чашми ёри маҳрӯ,
Парастораш, парастораш – муҳаббат.

---

Диламро гурги ҳиҷрон мехурад боз,
Шикасти аҳду паймон мехурад боз.
Вуҷуди хастаамро реза-реза,
Даду деви пушаймон мехурад боз.

---

Дилам боғу муҳаббат – рангу бӯяш,
Дилам роҳу муҳаббат – чор сӯяш.
Дилам – махмуру масту ринду айёш,
Муҳаббат – соқиву нуқлу сабӯяш!

---

Ҳабиби шурбу соғар мекунад Ишқ,
Шаҳаншаҳро қаландар мекунад Ишқ.
Ба шаҳри худ, миёни хешу пайванд,
Ғариби бӯсаи тар мекунад Ишқ!

---

Ба дил баҳри тавоф омад муҳаббат,
Аҷаб афсонабоф омад муҳаббат!
Ба саҳни қалби ман олуда бо хун,
Зи майдони масоф омад муҳаббат!

---

Дили ман нахл буд, афшонда рафтӣ,
Начидӣ меваҳояш, монда рафтӣ.
Ба лабҳо ханда, хондӣ шеъри Ҳофиз,
Дубайтии маро нохонда рафтӣ!

---

Қасам хӯрдам, дигар ошиқ нагардам,
Ки гар ошиқ шавам, дигар на мардам!
Қасамҳоро ба назди дил ниҳодам,
Қасамҳо ҳам шикаст аз захму дардам.

---

Шаби торики мо бадре надорад,
Нишасти шеъри мо садре надорад.
Дар ин бозори навбунёди қаллоб,
Куҳанколои мо қадре надорад.