ДУБАЙТИҲО

Қалам, эй хушбаёнтар аз ману ишқ,
Қалам, эй роздонтар аз ману ишқ!
Забони воҳиде бар мо бубахшо,
Қалам, эй ҳамзабонтар аз ману ишқ!

---

Аҷоиб нағмае сар мекунад Ишқ,
Биёбонро муъаттар мекунад Ишқ.
Агар дар ихтиёри ӯ супорӣ,
Ҷаҳонро пур зи Ҷаъфар мекунад Ишқ!

---

Ҳисори ақлу динамро шикастӣ,
Дили ишқофаринамро шикастӣ.
Гиреҳ накшода аз байти ду абрӯт,
Дубайтии ҷабинамро шикастӣ.

---

Дилам банду дилам банди Бухорост,
Вуҷудам решапайванди Бухорост.
Нигорам аз Бухорои Самарқанд,
Дили ман аз Самарқанди Бухорост.

---

Муҳаббат ранҷу ранҷураш дилам буд,
Муҳаббат ганҷу ганҷураш дилам буд.
Муҳаббат хамру махмураш дилам буд,
Муҳаббат дору Мансураш дилам буд.

---

Дилам киштиву дарёяш – муҳаббат,
Дилам имрӯзу фардояш – муҳаббат!
Муҳаббат дашти бепоён, дилам – Қайс,
Дилам Маҷнуну Лайлояш – муҳаббат!