---

Гар ёр маро ба худ раво донад, бас,
Бегона надонад, ошно донад, бас!
Розест миёни мо, қалам маҳрам нест,
Ман донаму ӯ, дигар Худо донад бас!

---

Бар ҳоли табоҳи ту дилам месӯзад,
Бар ҷурму гуноҳи ту дилам месӯзад.
Чун бахти сиёҳи ту ба ёдам ояд,
Бар чашми сиёҳи ту дилам месӯзад.

---

Аз хоб мапурс, хоби мо бехобист,
Дил бурдану дил додану ҳам дилёбист.
Майхора шудему нархи май гашт гарон,
Мо дузд шудему шаб шаби маҳтобист.

---

Дунёст, вале ҷой ба дунё нашавад,
Дарёсту маҳдуд чу дарё нашавад.
Ҷоест, ки дар хотираи нақшае нест,
Роҳест, ки ҷӯяндашу пайдо нашавад.

---

Эй олами ҷону ҷони олам, боз о,
Эй марҳами ҷону ҷони марҳам, боз о!
Номаҳраму ғайр аст маро ҷуз Ту ба даҳр,
Эй маҳрами ҷону ҷони маҳрам, боз о!

---

Сахт аст, бидонӣ, ки надонӣ чӣ шавад?
Талх аст, надонӣ, ки бидонӣ, чӣ шавад?
Боре, ки ба дӯш мекашӣ, бар манзил
Боре зи қазо гар нарасонӣ, чӣ шавад?