Эй, монда кулоҳи нозанин каҷ

Эй, монда кулоҳи нозанин каҷ,
Кай монда касе кулаҳ чунин каҷ?!
Рӯмоли базеби ту куҷо шуд?
Мебастияше чӣ нозанин каҷ!
Зебат, ба Худо, ки нағз медод
Рӯмоли базеби гирбишин каҷ!
Кай мекуние ту дасти моро
Дар гардани нағзи нозанин каҷ?!
Чашмак бизану ба нози ширин
Моро бикушу дигар набин каҷ!
Мо рост ба пои худ ситодем,
Хушрӯ ту нишастаӣ, бубин, каҷ!
Бисёр нишастаӣ ту хушрӯ,
Мо рост мурему ту бишин каҷ!

Абрӯи қаламкашидаи ту

Абрӯи қаламкашидаи ту
Хушрӯст ба рӯи дидаи ту.
Абрӯй қалам кашида, бигзор,
Ман сурма кашам ба дидаи ту.
Худро бикушам, хуш аст бисёр
Бо сурмакашӣ ба дидаи ту.
Во, куштани мо ба чашми мардум!
Во, сурмакашӣ ба дидаи ту.
Боре, ба Худо, намекашам по
Берун зи хати кашидаи ту.
Дар хок намеравад зи ёдам
Эй, ҳар ду лаби газидаи ту.
Мурдам, ба Худову пас расидам
То пеши бари расидаи ту.
Як бор бимон, ки ман дароям
Дар боғи касе надидаи ту.