Побанд гаштастем, вой,
Во, банди пои нозанин!
Банди дили худ меканем
Ё банди пои нозанин.

Ёрон гирифта дасти ҳам,
Мо банди пои нозанин.
Гиранда гаштастем, вой,
Мо гандаҳои нозанин!

Аз сад ҳазорон по хуш аст,
Во, ҳар ду пои нозанин!
Мардум хӯрад хуш пои гов,
Мо ҳар ду пои нозанин.

Гар мо набошем, эй Худо,
Дар кӯчаҳои нозанин,
Ҳай нозанинаш мебаранд
Шаҳбаччаҳои нозанин.

Инҳо ҳама гурганд, гург,
Бин гургҳои нозанин.
Ҳай нозанинаш мехӯранд
Ин гургҳои нозанин.

Дар дасти ман мурғанд, мурғ,
Бин мурғҳои нозанин.
Бе ман ҳама гурганд, гург,
Ин мурғҳои нозанин.

Раҳмони шери Остон,
Шуд роҳпои нозанин.
Худ мехӯрад, бинад агар
Ногоҳ пои нозанин.

Бозори Собир дид агар
Як бор пои нозанин,
Тори сараш созад, нигар
Дар тор пои нозанин.

Дар боғ ногаҳ, вой, зад
Хоре ба пои нозанин.
Ширин, чи ширин вой зад,
Бисёр вои нозанин.

Хушрӯ ду дандонам кашид
Як хори пои нозанин.
Гуфтам куҷо шуд вой-вой,
Он вой-вои нозанин?!

Дунё намеарзад ҳамаш
Бар хоки пои нозанин.
Ҳай нозанинон мурда бин
Дар хоки пои нозанин.

Не-не, надорад гарди хок,
Савганд, пои нозанин!
Савганд аз ҷон мехӯрам,
Савгандҳои нозанин.

Сад бор аз ҷон мехӯрам
Савгандҳои нозанин
Бо ҳар ду пои нозанин!
Во, ҳар ду пои нозанин!

Ҳарчанд мехоҳанд кушт
Моро барои нозанин,
Дасте наметонад кушад
Моро барои нозанин.