Мардум газанде дасти худ,
Мо дастҳои нозанин.
Девона рӯзе мешавем –
Мо мастҳои нозанин.

Беҳ аз ҳазорон рӯсафед
Ин рӯсиёи нозанин!
Гаҳ рӯ кунад хушрӯ сафед,
Бин рӯсиёи нозанин!

Сар нозанинон мезананд
Пеши ду пои нозанин.
Хуш бар сари мо мезанад
Неши ду пои нозанин.

Мардум ба гардун сар зананд,
Мо сар ба пои нозанин.
Мо аз ҳамаш боло занем
Бо сарбапои нозанин.

По бар сари ҳафт осмон,
Мо дар сарои нозанин.
Оҳ, эй Худо, чун меравем
Мо сарфарои нозанин?!

Бисёр хушрӯ медиҳад
Бо хандаҳои нозанин,
Во, нозанин лабҳояше,
Во, хандаҳои нозанин!

Лабҳои ширин хандарез,
Гелосҳои нозанин.
Дандони рези шишабур,
Алмосҳои нозанин.

Ҳай нозанин хуш медиҳад,
Во, бӯсаҳои нозанин.
Оташ занад, обам кунад
Бо бӯсаҳои нозанин.

Ҳай нозанин мерезаде
Шабнам ба пои нозанин!
Як боғ шабнам чисте?
Бин шабнамои нозанин!

Дар кӯчаҳо чархем чун
Хуш по ба пои нозанин,
Сад раста гул мерӯяде
Аз почаҳои нозанин.

Бинад касе, саг мешавад
Дар кӯчаҳои нозанин.
Дар кӯчаҳо кам несте
Сагбаччаҳои нозанин.

Сагбаччаҳои нозанин
Аз пушти пои нозанин
Ҳай санг бар сар мехӯранд,
Ҳай сангҳои нозанин.

Бисёр хӯрдастем санг
Мо ҳам барои нозанин.
Саг банди пои мо гирифт,
Мо банди пои нозанин.

Во, банди пои нозанин!
Мо – банди пои нозанин!
Шӯхӣ накардем, эй Худо,
Бо банди пои нозанин.