Оташи оташдон хеле баланд аст. Соҳиби қалъа марде баландболо, бо рише кӯтоҳ ва дар либоси фоҳир ворид мешавад.

Абумуслим: Аз Бухоро расуле расидааст, амирамро мулоқот кардан мехоҳад.

Амир Исмоил: Ӯро биёред.

Абумуслим ба талаби расул меравад. Ва баъди чанд лаҳза бо расул бармегардад. Расул бо ворид шудан замини хизмат бӯса мекунад.

Амир Исмоил: Бигӯ, аз Бухоро чӣ хабар овардай?

Расул: Сояи давлати амирам бар ҷаҳон густарда бод. Амир Наср ба Бухоро андар омаданд ва шаҳрро аз вуҷуди мубораки ҷанобашон холии ёфтанд, алҳол ба сӯйи Байканд меоянд.

Амир Исмоил: Ҳангоми вуруди амирам шаҳр чӣ вазъ дошт? Мардум шоҳи кишварро чӣ тавр қабул карданд?

Расул: Мардумони шаҳри Бухоро ба истиқболи амир Наср баромаданд ва ишонро бо лашкарашон хеле хуб қабул намуданд. Амир Наср ду рӯз дар Бухоро монданд ва ба талаби ҷаноби олӣ ба ин тараф меоянд.

Амир Исмоил: Бузургони Бухоро чӣ мегӯянд?

Расул: Ба ҷуз Абумуҳаммади Бухорхудот боқӣ ҳама дар рикоби шоҳ даромадаанд ва ба ин ҷониб меоянд.

Амир Исмоил: Чаро Абумуҳаммад бо амирам ҳамроҳ нашуд?

Расул: Дар ҳаққи ишон овозаҳо бисёр буд: яке мегуфт, ки ӯ аз тарс бемор шудааст ва дигаре мегуфт, шоҳам ӯро ба зиндон андохтаанд. Касе чизи дурустеро дар ҳаққи ишон намегӯяд ва ё намедонад.

Амир Исмоил: Чӣ ном дорӣ?

Расул: Ҳофизаддин, фарзанди Хоҷа Юнуси Бухороӣ.

Амир Исмоил: Фарзанди Хоҷа Юнуси фақеҳ?

Расул: Оре, амирам.

Амир Исмоил: Пас шумо Имом Ҳофизаддини Бухороӣ ҳастед?

Расул: Оре, амирам.

Амир Исмоил аз ҷояш мехезад ва ӯро дар канор мекашад ва дар бари хеш мешинонад.

Амир Исмоил: Ман дар бораи фазлу дониши шумо аз марҳум Хоҷа Абилҳафс бисёр шунидаам. Вале намедонистам