Дар мавриди харидории шир ва маҳсулоти ширӣ чиро бояд донист?
Шир ранги сафеди каме зардча дошта, зардии он аз камиву зиёдии равғаннокиаш дарак медиҳад. Ранги зардча асосан аз каротин, ки дар таркиби равғани шир мавҷуд аст, пайдо мешавад. Шир дар таркиби худ, ҳамчунин, пигментҳои зарди сабзтоб дорад, ки ба фаллаи ширӣ ранги махсус медиҳанд.
Рангҳои дигари шир, аз қабили сурхчатоб, кабудча, гулобӣ нишонаи аз ҳайвони касал ҷӯшида шудани шир ё вайрон будани он аст.
Тамъи шири нав каме ширинтар буда, шири пастеризатсиякардашуда ва ё пухташуда бошад, маззаи «ҷӯшонидашуда»-ро дорад.
Шир, ҳамчунин, маззаи талхиву туруширо низ дошта метавонад, ки ин нишонаи дар таркиби шир мавҷуд будани бактерияҳои туруш аст, ки сабабгори вайроншавии таркиби шир мегарданд.
Нишонаи туруш шудани шир маззаи турушӣ ва ё бӯи нохуши он аст. Шир бӯй ва тамъи дигар чизҳоро зуд ба худ мегирад, бахусус вақте ки дар зарфи болояш кушода нигоҳ дошта мешавад.
Ширро нопухта (пастеризатсия накарда) хӯрдан мумкин нест, онро дар муддати 3–5 дақиқа аз вақти ҷӯшиданаш ҷӯшонидан лозим аст. Ба воситаи шири нопухта микробҳои паҳнкунандаи бемориҳои осеби шуш (туберкулёз), захмҳо (сибирская язва), холера, салмонеллёз, стафилококк, стрептококк ва ғайра ба организми инсон ворид шуда метавонанд.
Шири пастеризатсияшуда ширест, ки дар ҳарорати хеле баланд коркард ва баъдан хунук карда шуда, барои истеъмол тайёр маҳсуб мешавад. Шири дубора пухтаи пастеризатсияшуда қисме аз маводҳои ғизоияшро (сафеда, витаминҳо ва ғайра) гум мекунад.
Ҳамидзода Саидмуҳаммад,
сармутахассиси бахши назорати давлатӣ дар МАС-и МТМ дар ноҳияи Данғара




