Алошақшаққа хез зада-хез зада, гиряю нолакунон ба таги Чанор рафт. Чанор аҳволи вайро дида, ҳайрон шуда пурсид:

• Эй, Алошақшаққа, ҳар рӯз пару бол доштӣ, шақ-шақ гуфта, шодӣ карда, омада ба шохи ман меништию имрӯз чӣ шуд, ки пару болат бутун рехтагӣ, рӯ-рӯи замин гиряю нола карда гаштай?

• Эй дарди мана напурс! - гуфт Алошақшаққа, - Кайкак мурдачаст, Канаяк рӯкандаю мӯканда, манам Алошақшаққаи паррехта.

• Ин хел бошад, манам чанори баргрехта, - гуфта Чанори азамат тамоми баргашро ба замин рехта, луч шуд.

Фурсати як чойхӯрӣ нагузашта, Бузак ба таги Чанор баргхӯрӣ омад. Омада дид, ки таги Чанор ҳафт қабат барг.

• Эй Чанор, худаш чӣ гап? Ҳар рӯз омада, базӯр якта-нимта барги туро ёфта мехӯрдаму имрӯз чӣ шуд, ки ҳамаи баргҳоятро партофтаӣ, луб-луч шудаӣ?

• Оҳ, дарди маро напурс! - гуфт Чанор шоҳҳояшро ларзонда, - Кайкак мурдааст, Канаяк рӯкандаю мӯканда, Алошақшаққа паррехта, ман ҳам Чанори баргрехта!

• Ин тавр, ки бошад, ман ҳам Бузаки шоҳшикаста! - гуфта Бузак ду шоҳашро гурсӣ ба санг заду шикаст.

Сонӣ Бузак ба лаби ҷӯй рафта об хӯрд. Оби равон ӯро ба ин ҳол дида, ҳайрон шуда пурсид:

• Эй Бузаки бечора, ҳар рӯз шоҳдор будӣ, чӣ шуд, ки имрӯз ҳар ду шоҳат шикастагӣ?

• Эй обаки равон, ҳоли маро пурсида чӣ кор мекунӣ? – гуфт Бузак оби дида рехта. - Кайкак мурдааст, Канаяк рӯкандаю мӯканда, Алошақшаққа - паррехта, Чанор - баргрехта, ман ҳам Бузаки шоҳшикаста.

• Эй вой ба ҳоли зори Канаяк! – гуфт Оби равон худро такурӯ карда, - Кайкак ки мурда бошад, ман ҳам обаки лойолуд.