Асарҳои мунтахаб ҷилди 5

-Ташаккур, - ман пиёларо аз дасти муфаттиш гирифта онро ҳамоно ба лаб бурдам ва баъди нӯшидани ҷуръае пиёларо болои миз гузошта гуфтам:- Мутаассифона, то кунун мо дар бораи қотил маълумоте ба даст наовардаем ва илова бар ин нафареро, ки бояд алибии Парвина Қамарро тасдиқ мекард, гӯё замин фурў бурда.
-Аз таги замин ҳам бошад, ўро ёфтан лозим.
-Ҷустуҷў дорем, вале бе натиҷа.
-Шояд ўро ҳам? - дасташро чун корд аз зери гарданаш гузаронида гуфт муфаттиш.
-Дилатонро дур набаред!
-Пас ў куҷо шуд ё лаълии парон вайро ба сайёраи дигар бурд?
-Не, албатта.
-Дар бораи вай боз ягон маълумот дастрас намудед?
-Албатта.
-Хуш он чӣ маълумоте будааст?
-Усмон Башир хакери (нафаре, ки компютерро барои манфиат истифода мебарад) шинохта аст.
-Хакер ё хакери шинохта?
-Хакери шинохта.
-Барои кадом хизматҳояш?
-Ду сол пеш вайро барои вайрон намудани сети муҳофизатии бонкӣ дастгир намуданд.
-Ду сол пеш?
-Бале.
-Пас чаро вайро ба маҳкама накашиданд, модоме вай чунин шӯҳратёр будааст?
-Гуноҳашро дайн карда натавонистанд.
-Аз ин бармеояд, ки вай бегуноҳ будааст.
-Баръакс, дар нисбати вай далелҳо кофӣ буданд, вале бо гуноҳи кормандони милиса он ҳама далелҳо ба боди фано рафтанд.
-Ҳеҷ шуморо нафаҳмидам, рафиқ майор.
-Усмон Баширро ҳангоми ғайриқонуни шикастани сети муҳофизати ва ворид шудан ба сети бонкӣ дастгир намуданд.Чун ўро ба милиса интиқол доданд, компютерашро ҳам чун далели шайъи дар асоси санад гирифтанд...




