Ҳама чашм наканда ва дам ба дарун гирифта, гӯшро тез карда

— Шумо ҳамон ҷоеро дар назар доред, ки кӯлмаки хун буд?— бо тааҷҷуб мепурсад раиси суд.
— Ман ҷои кушташудагии Генри Пойндекстерро дар назар дорам.
Ин суханон дар байни тамошобинон мавҷи нави тааҷҷубро ба амал меорад — садои пичир-пичир ва нидоҳои на чандон баланд шунида мешаванд. Нолиш аз дигар ҳама овозҳо баландтар садо медиҳад. Ин садо ногаҳон аз қалби Вудли Пойндекстер, ки ба набудани писараш дигар шубҳа намекунад, мебарояд. То ин дам дар дили падар ҳамоно умед шарора мезад, ки шояд, Генри ҳанӯз зинда бошад. То ин дам ҳанӯз исботи таъйини марги писараш набуд, бошад ҳам, фақат далелҳои бевосита ва чандон боварибахш набуданд. Вале акнун суханони худи ҷинояткор ин умедро барбод медиҳанд.
— Пас, шумо боварӣ доред, ки Генри Пойндекстер мурдааст?— мепурсад прокурор.
— Боварии комил дорам,— ҷавоб медиҳад айбдор.— Он чи ки ман дидам, агар шумо медидед, мефаҳмидед, ки ин саволатон то кадом андоза бефоида аст.