— Шумо саҳв мекунед, мистер Стумп. Ӯ ба забони англисӣ ҳам гап мезанад... Ҳамту не, хонум?

— Кам-кам ба англисӣ гап мезанам, — ҷавоб дод мексикои-духтар, ки то ҳол хомӯш истода гӯш мекард. — Кам-кам.

— Анаю халос! — каме хиҷил шуда хитоб намуд Зеб: — Мебахшед, сеньорита. Шумо ба забони англисӣ кам-кам ҳарф мезанед? Муҷо боно — боз беҳтар. Дар он сурат, сабаби ба ин ҷо қадам ранҷумандатонро ба ман баён карда метавонед. Роҳро-ку гум накардаед?

— Не, сеньор... — ҷавоб дода хомӯш гардид ӯ.

— Пас, дар куҷо буданатонро медонед?

— Бале, сеньор... Бале... Ин хонаи Морисно Зерал аст?

— Бале, ҳамин тавр. Нағзаш номашро нагиред... Ин кулбаро хона номидан мушкил, вале дар ҳақиқат ӯ дар ҳамин ҷо зиндагӣ мекунад. Шумо соҳибабро дидан мехоҳед?

— Ҳа, сеньор, мехоҳам. Ман барои ҳамин омадаам.

— Хайр, ман муқобилат намекунам. Охир шумо ягон қасди бад надоред? Аммо аз ин чӣ нафъ? Ӯ шуморо аз тагҷармии худ фарқ намекунад.

— Ӯ бемор аст? Бо вай ягон фалокат рӯй додааст? Ана ин кас инро ба ман гуфт.

— Ҳа, ман инро ба ӯ гуфтам, — ҷавоб дод Фелим.

— Гапаш дуруст, — ҷавоб дод Зеб. — Ӯ маҷрӯҳ мебошад. Ва ҳозир кам-кам олой мегӯяд. Ба фикрам, ҳеҷ хавфи ҷиддӣ нест. Умед кардан мумкин, ки ба зудӣ ба ҳуш меояд.

— Оҳ сеньор, то сиҳат шуданаш ман мехоҳам ба ӯ касалбонӣ кунам! Аз барои худо, иҷозат диҳед, ки дароям ва ман ба ӯ нигоҳубин мекунам. Ман дӯсташ, дӯсти содиқаш.

— Майлаш, ин ҳеҷ ҷон гандагӣ надорад. Мегӯянд, ки ба бемор нигоҳубин кардан — ин кори зан. Ростӣ гап, аз бозии занамро гӯрондан, инро наозмудаам. Модоме, ки шумо дӯсташ бошеду ба ӯ нигоҳубин кардан хоҳед, марҳамат. То рафта омадани мо, метавонед ҳамроҳаш истед. Лекин назорат кунед, ки аз кат наафтад ва бандинаҳояшро канда напартояд.

— Хотиратон ҷамъ бошад, сеньор. То аз дастам омадан, ман ӯро эҳтиёт мекунам. Вале гӯед: кӣ ӯро захмдор кард? Ҳиндуҳо? Охир онҳо дар ин наздикиҳо нестанд. Ӯ бо ягон кас занозанӣ кард?

— Дар ин хусус, сеньорита, чӣ қадаре ки шумо донед, ман ҳам ҳамон қадар медонам. Ӯ бо койотҳо задухӯрд кардааст. Вале зонуяш маюб мебошад ва ба ин койотҳо гуноҳ надоранд. Ман дирӯз пеш аз ғуруби офтоб ӯро дар паттазор ёфтам. Ӯ то