— Мурдааст? Ту, шояд, шӯхӣ кунӣ? Ё худ ҷиддӣ гап мезанӣ?

— Оҳ, масса Стумп! Ба гуфтан забонам намегардад, вале ин ҳақиқат аст. Ҳама ба ҷустуҷӯ баромадаанд, ки мурдаашро ёбанд.

— Ма, инро ба ошхона бар. Дар ин ҷо мурғи марҷон ва якчанд мурғи даштӣ ҳаст. Мисс Луиза дар куҷост?

— Мистер Стумп, ман дар ин ҷо. Ин ҷо биёед! — ҷавоб дод овози пуртанин, ки ба шикорчӣ нағз шинос буд, вале ин дафъа чунон маҳзун буд, ки Зеб Стумп базӯр онро шинохт. — Афсӯс! Ҳар он чӣ ки Плутон ба шумо гуфт, — ҳамаш ҳақиқат мебошад. Додарам гум шудааст. Парерӯз бегоҳӣ инҷониб ҳеҷ кас ӯро надидааст. Аспаш ба хона гашта омад, ки зинаш пур аз доғи хун буд. Оҳ, Зеб, ҳатто фикр кардан даҳшатнок мебошад!

— Набошад, чӣ! Ӯ баромада ба ким-куҷо рафт ва аспаш танҳо гашта омад... Ман, мисс Луиза, намехоҳам, ки дарду алами шуморо дучанд кунам, вале — модоме ки кофтуков давом карда истодааст, шояд, ман ёрдам карда тавонам, барои ин бояд аз воқеа батафсил огоҳ бошам.

Ҳар чӣ ки Луиза медонист, ба Зеб гуфта дод. Ӯ фақат дар бораи воқеаи дар боғ шудагӣ ва он чӣ ки пештар аз он рӯй дода буд, гап назад. Барои тасдиқи он, ки шояд, Генри аз пас мустангер рафта бошад, ба нақли Обердофер истинод кард.

Вақте ба гап сар карда гуфт, ки Морисро кушандаи додараш мешуморанд, овози вай аз ғаму ғуссаи тоқатфарсо, ки дам ба дам ба қаҳру ғазаб табдил меёфт, канда мешуд.

— Ин дурӯғ! — ба қаҳру ғазаби вай шарик шуда фарёд зад шикорчӣ. — Тӯҳмат! Ин гапи бофтаи ягон нобакор! Ҳамчинаш кам буд! Мустангер аз касоне нест, ки ин корро кунад. Ин ба вай чӣ лозим? Агар дар байни онҳо кину адоват мебуд, гапи дигар, вале охир ин набуд! Ман гуноҳи мустангерро ба гардан мегирам — ӯ чандин маротиба додари шуморо ба ман таъриф карда буд. Рости гап, ӯ бачаи аммаи шуморо чашми дидан надошт, — ман донистанӣ будам, ки кӣ ӯро дӯст медорад? Мебахшед, ки ман инро ба шумо мегӯям. Раваду агар дар байни додари шумо ва мустангер ягон муноқиша рӯй дода бошад, онҳо...

— Не-не! — фарёд зад креолдухтар ва дар авҷи ғаму ғусса худро ошкор кард. — Ҳамаш яктарафа карда шуда буд. Генри мехост узр бипурсад, худаш гуфт, ки ӯ ҳақ нест, аммо Морис...

Нигоҳи пуртааҷуби ҳамсӯҳбат Луизаро маҷбур кард, ки хомӯш гардад. Ӯ рӯяшро бо дастонаш пӯшонда зор-зор гирья кард.