Туро бо ғами хештан кор бошад,
Ки аз ту ҷуз ин кори дигар наояд.

Ту, эй Анварӣ, гар набошӣ, чи бошад,
Аз ин ҳеҷ тӯфон ҳаме барнаояд!

---

Ба умре дар кафам боре наояд
В-ар ояд, ҷуз ҷигархорӣ наояд.

Баномэзад, зи бустони замона
Зи гул қисмам ба ҷуз хоре наояд.

Кунун нақшам касе мебозмолад,
Ки бо ӯ аз ду шаш чоре наояд.

Ба ҷоне бӯсае мехостам, гуфт:
«Ба ҳар ҷоне яке боре наояд!»

Маро дар мазҳаби ишқаш мурод ӯст
Зи даҳ саҷҷода зунноре наояд.

Ба сарфи ҷон чу дар бозори ҳуснаш
Ба сад динор дидоре наояд.

Бар ӯ чун кисае дӯзам, ки ҳаргиз
Маро дар киса диноре наояд.

Мабанд, эй Анварӣ, дар кори ӯ дил,
Туро з-ӯ равнақи коре наояд!

---

Зи аҳди ту бӯи вафо менаояд,
Ки аз кӯи ту ҷуз ҷафо менаояд.

Ҷаҳонест ҳуснат, ки ҷуз тухми фитна
Бар он обу хоку ҳаво менаояд.

Магар бар куҷо омад осеби ҳаҷрат,
Нишон деҳ, бигӯ, бар куҷо менаояд?

Чунон даст бар хун равон кард чашмат,
Ки як тири ғамза-ш хато менаояд.

Баномэзад, аз дӯстони замона
Яке бо яке ошно менаояд.