Зерузабар аз ғояти мастию чу биншаст,
Маҷлис ҳама аз валвала зеру забар омад!

Нуқлам ҳама шуд шаккару бодом, ки он бут
Бо чашми чу бодому лаби чун шакар омад.

З-он қадди чу шохи суману рӯи чу гулбарг
Сад шохи нишотам, чу даромад, ба бар омад.

Аз хиҷлати рӯяш ба даҳон тира фурӯ шуд
Ҳар моҳ, ки дӯш аз уфуқи ҷом баромад.

Будем ба ҳам даршуда бо қомати мавзун
В-он қомати мавзун зи қиёмат батар омад!

Мо бесарусомон зи харобию замона
Фарёд ҳамекард, ки шаб-тон ба сар омад!

Шаб рӯз шавад баъди насими саҳару дӯш
Шуд рӯзи дилам шаб, чу насими саҳар омад.

---

Зулфат чу ба дилбарӣ даромад,
Бас кас, ки зи хонумон баромад.

Ҳам рояти хушдилӣ нагун шуд,
Ҳам давлати беғамӣ сар омад.

Дил гум нашавад дар ончунон зулф,
К-аз фитна ҷаҳон ба ҳам баромад,

К-андеша ба ҳалқа то-ш дар шуд,
Гум гашт, чу ҳалқа бар дар омад.

Чашми сияҳи сапедкорат
Дар кор чунон сияҳгар омад,

К-аз кибр ба дасти илтифоташ
Паҳлӯи замона лоғар омад.

Чандон ҳазари ман аз ғами ту,
Оваҳ, ки ғами ту беҳтар омад.

Дар мавкиби турктоз ғамза-т
Бишкаст дари дилу даромад

Бе ранги рухи ту чун барад ҳусн,
Моҳ омаду дар баробар омад.