Ва ин қисса дар байни арманиҳо машҳур гардид ва ба ин ном дукону каҳвахона доранд. Ба қавле барои баровардани дуди ғам фабрикаи тамокуи Арманистон ба яке аз навъҳои сигор «Ахтамар» ном гузошт…
– Марҳамат,– гўён пешхизмат хўроки овардаашро болои миз гузошта, ба ҳарду иштиҳои таом орзу карда, аз наздашон дур шуд.
– Афсўс, ки Юрий Димитровичро ҳамроҳ наовардӣ, – гуфт Сафар Раҷабов.
– Охир ман нақли ўро нарезондаю начаконда ба Шумо расонидам, боз чӣ мехоҳед?
– Агар Юрий Дмитрович мешуданд ҳамроҳашон панҷта– панҷта мегирифтам.
– Ҳарчанд ман нанўшам ҳам то ҳанўз касеро барои нўшидан маън накардаам.
– Медонам.
– Пас чаро наменўшӣ?
– Танҳо нўшиданро хуш надорам.
– Чӣ илоҷ ман дар ин ҷода пиёдаам.
– Гўш кунед, Акбар Ҳакимович, ман тайёрам, ки фардо ҳам ба шарофати муҳтарам Тимошенко Ю. Д. дар ҳамин ҷо зиёфат диҳам.
– Ба кадом хотир?
– Ба хотири он ду дилдодаи ноком.
– Ба хотири Арсен ва Тамара.
– Бале.
– Саргузашти онҳо ба Шумо маъқул шуд:

– Аз садои сухани ишқ надидам хуштар,
Ёдгоре, ки дар ин гунбази даввор бимонд.3

– Ба ҳар ҳол Юрий Димитрович омада наметавонад.
– Чаро?
– Чун ки ў дар ҷумҳурӣ нест.
– Пас ба Шумо ин саргузаштро кӣ нақл кард, ё ин бофтаи худатон аст?
– Не дар ин ҷо ягон сухане бофта нест, ман онро ҳанўз соли 1974 аз забони худи Тимошенко шунидаам.