О Ҳ, Т А М А Р А!

ҚИССА
Тамоми шаб ў мижа таҳ накард. Симои Наташа ҳеҷ аз пеши назараш дур намешуд. «Бо ҷинояткорон даст ба гиребон шудан осонтар аст аз он, ки ба ў бигўям: – Тўро дўст медорам…
Ба фикрам Наташа шунидани ин сухани ширинро интизор буд, вале ман ҷуръати гуфтани онро накардам. Хайр чӣ, модоме ки ман нагуфтам, чаро вай худаш чизе нагуфт. Ё ғурур кард… Пас муҳаббат куҷост? Ғурури нозарурамро Худо гирад…
Сару калобаашро гум кардагӣ барин пасу пеш қадам зада, даст ба рўйи дилаш бурда буд, ки аз қалбаш садо шунид:
«Исто ки чиҳо гуфта истодаӣ. Лаҳзае андеша намо. Охир он яроқашро ҳам мепартофт. Агар гумонат чунин бошад он ботил аст. Ё гумон мекунӣ, ки рўзе ин суханонро аз даҳони ў мешунавӣ. Не– е… Агар худат ҷуръат пайдо карда, ўро ба даст дарорӣ чӣ хуб, вагарна…
– Чӣ ў аз даст меравад?
– Албатта. Лаби боми ту нашуд, лаби боми дигаре.
– Охир ў манро дўст медорад.
– Медонам.
– Пас чӣ ҷойи шубҳа?
– Аз хушачини оддӣ беш нестӣ.
– Магар ин кам аст?
– Барои муҳаббати ҳақиқӣ ин қатрае аз баҳр аст.
– Чӣ магар аз осомон ситора биёрам?
– Ба фикрам ақлат ба ҷояш омад ва акнун гўш кун:

Хушачинии замин дарвешест,
Чидани хушаи Парвин ишқ аст!

– Фардо ман ҳамаашро ба Наташа мегўям.
– Мебинем».
Бо ҳамин фикру хаёлҳои ширин қарибиҳои субҳ хоб ғалаба карду лейтенанти милиса Абдумаҷидовро аз муколамаи минбаъда бо қалбаш вораҳонд.

… 2 …
Шаб ором гузашт. Навбатори ШКД ноҳияи Гулистон капитани милиса Беков аз рўйи тартиби муқарраршуда соати шаши субҳ дар бораи вазъи ноҳия ба Раёсати корҳои дохилии шаҳр телефонӣ хабар дод.