Чӣ биёмад ба сарат, ҳо писарам?
Вой, хоки ҳама дунё ба сарам.
Ман дар ин ҷо чӣ шудам, то ту шавӣ?
Ҳайф, сад ҳайф, ки чун мо ту шавӣ...

Худоё

Гирифтори ҳазору сад балоем,
Фаромӯш аз худему аз Худоем.
Аз ин иллат кӣ медонад, Худоё,
Аз ин миллат чӣ мемонад, Худоё?

Сияҳрӯ

Ҳама бедоди ҷаҳон мегузарад,
Ба Худо, дидаву рӯ мемонад!
Ҳар кӣ гирёнд касеро, охир
Нолаи нон ба гулӯ мемонад!
Дер дар дидаи мардум, ба Худо,
Лахчаи ду бари рӯ мемонад!

Саркӯб

Зиндагӣ шуд баду мо хуб шудем,
Дар бади мо заду мо хуб шудем.
Гаҳ лаби нон ба лаби хоне нест,
Қолаб аст ин ҳамаву ҷоне нест.
Пеши сад гандаву бад хуб шудем,
Сарбаланд омада саркӯб шудем.

Дар Ватанам

Боре дами беғам назадам дар Ватанам,
Дамгир шудам, дам назадам дар Ватанам.
Дар кӯчаи тангу тор саргардонам,
Дар чоҳи бало кам назадам дар Ватанам.
Овард бало ҳар ду сунаш бар сари ман,
Бо ин ҳама барҳам назадам дар Ватанам...