ДИЛАМ ХУН ШУД

Дилам хун шуд, дилам хун шуд, бародар,
Дилам аз сина берун шуд, бародар.
Нигар, хун шуд, нигар, хун шуд дили ман,
Ҷигархун шуд, ҷигархун шуд дили ман.

Дилам аз дасти ту бишкаст, эй дӯст,
Дилам шуд масти ту, бишкаст, эй дӯст.
Дили бишкаста рӯи дастам, эй вой,
Ба ашкам шуста рӯи дастаме, вой!

Ҳама якҷову ту танҳо нишастӣ,
Дар ин таҳ мову ту боло нишастӣ.
Биё, бо мо бишин, ё гӯ биёед,
Дар он боло чаро бе мо нишастӣ?

Худои меҳрубон, моро нигаҳ дор,
Нигаҳ моро зи шабҳои сияҳ дор.
Сияҳрӯз аст мардум, вой, сад вой,
Сияҳрӯзӣ ба ҷони мо бизад, вой.

Худоё, чораи бечораҳо соз,
Аз ин гарданкаҷӣ моро раҳо соз.
Худоё, сарфарозони Ватан ку?
Диловар – дилнавозони Ватан ку?

Ало духтар, шуморо ёр гаштем,
Дар ин шаҳри шумо бекор гаштем.
Дар ин шаҳри шумо бекор бисёр,
Зи неши морҳо бемор бисёр.