Бигзор маро ту бо Худои ҷонам,
Гирям ба Худои ҷон барои ҷонам.

Бигзор, дилам об шавад аз ғами ту,
Чашмам на дигар хоб равад аз ғами ту!
Бигзор, ғами туро ба гӯрам бибарам,
Чун тӯшаи роҳи дури дурам бибарам!

Хушрӯст лабат, гар нагазам, ҳай безеб,
Аз тобу табат гар напазам, ҳай безеб.
Безеб, агар туро нагирам ба канор,
Безеб, агар туро намирам ба канор.

Абрӯи туро қалам кашидам хушрӯ,
Дар чашми ту сурма ҳам кашидам хушрӯ.
Пероҳани ту, ҳай, накашидам, безеб,
Аз чашми сияҳ май начашидам, безеб.

Эй, сурати ту чунин кашидам хушрӯ,
Нозат ҳама нозанин, кашидам хушрӯ,
Пероҳани хушрӯт кашам ё накашам?
Бӯят кашаму бӯт кашам ё накашам?

Дар синаи ман дарду алам бисёр аст,
Эй, гуфтании ману қалам бисёр аст.
Дар сина задаст теғ, беҳис ёр аст,
Дил гашта ду ҳис, дареғ, беҳис ёр аст.

Мо баччаи беочаи бечора будем,
Рӯ сӯи Худо ба гиряву зора будем.
Ду пора ба рӯи дасти ғам як дили мо,
Фарёдзанон зи дасти ғам як дили мо.

Дар синаи мо ҳазор дарду алам аст,
Як ёр нагӯяд аз чи чашмат банам аст?
Ку модари ҷон, ки гӯяд ин ғам чӣ ғам аст?
Гӯям, ки ба дил чӣ доғу дарду алам аст.