Мардумоне таҳҷойӣ, ки бо даррандатарин нафс, ва буррандатарин ҳирс ва пўктарин сарҳо шигифтонидаанд торихи сабзи сиришт ва ақлро.

5-2000

ФАҚАТ ҶОН

Азройил ҷон меситонад, фақат ҷон...
Агар як зарра меситонид ришва, саросарии дунёро ҷое набуд барои ҷони мо.

3-2001
ШАДДАИ САПЕД

Дар гўристон ҷумҷумае пурсид:
-- чандсола будӣ?
Гуфтамаш:
-- чандинсолае дар чанд сония.

---

Шармин буд, ҳатто аз шарми худ мешармид.

---

Сукути туро мешамидам аз гунгии гўрҳо.
Борон оташи диламро мешуст.

---

Расми туро кашидам.
Аввал, бо ранги хунат сурх кардам лабонатро, сипас, бо ранги дилат сияҳ кардам мўятро.

---

Моддаро асл медонед?
Пас чаро ҷисматон дар адами рўҳ бўе намебарад аз асолати модда?

---

Шояд, нолаи шабгир нолаи шаб аст, ки ниҳояти бехуршедӣ металабад аз Ҳақ?!

---

Сапедор зарбаи табарро на бо сияҳҷеғ, балки пазирад бо сукуте, ки ҳазор сияҳҷеғро балъида.

---

Нигоҳам имшаб кулчаи ситора мехўрад ва бўи нон мекунад.

---

Одамӣ, агар зинда ба гўр мерафт, эҳтимол, ҷанги ҷаҳонӣ сар мезад миёни гўристонҳо, ва ё ҷаннати Худо ғорат мешуд...