Сиришкам донаи беҳосили кист?
Қумоши1 нола бори маҳмили кист?

Дилам ҳар лаҳза дорад изтиробе,
Тапишфарсуди шавқи бисмили кист?

Гуҳаррез аст чашми интизорам,
Намедонам, ки ин сарманзили кист?

Набошад гар ба қатли мо кашида,
Хами абрӯш теғи қотили кист?

Ба давр осон нагардад ин тасалсул2
Гиреҳ дар зулфи ӯ аз мушкили кист?

Забонаш ҳамчу тӯтӣ дар такаллум
Шакаррези бисоти маҳфили кист?

Бурун шуд аз кафам нақди дил, аммо
Надорам дил, намедонам дили кист?

Давонад ҳар тараф тӯфони ашкам,
Насиби заврақам аз ҳосили кист?

Хушо, Туғрал, аз ин мисрои Бедил:
«Наям огаҳ, ба чанги ӯ дили кист?!»

1 Қумош – рахт, матоъ.
2 Тасалсул – занҷир, аз решаи «силсила».

Қомати дилҷӯи ӯ сарви гулистони кист?
Орази тобони ӯ шамъи шабистони кист?

Гар набувад тири ӯ сӯи манаш дам ба дам,
Бар дили маҷрӯҳи ман новаки пайкони кист?

Боди сабо мебарад қофила бар қофила
Силсилаи мушкро, зулфи парешони кист?

Ханда ба гул мезанад вақти тамошо ба боғ,
Ғунчаи лаъли лабаш аз чаманистони кист?

Дӯш ба хоки дараш нола задам ҳамчу най,
Ҳеч нагуфт он санам як қалам афғони кист?

Гар на ба дашти ҷунун роҳнаварди туам,
Ин ҳама дар пои ман хори муғелони кист?

Пир шудам аз ғамаш, хатти баротам надод,
Сабзаи Хизри лабаш аз хати райҳони кист?

Рашк барад аз ҳасад тӯтии Ҳиндустон:
Туғрали ширинсухан аз шакаристони кист?