Баски зулоли лабаш хубтар аз Кавсар аст,
Чун суханаш дар Адан дурру гуҳар камтар аст,
Хоки қудумаш аз он бар сари ман афсар аст,
Сабзаи гулранги ӯ аз чаман афзунтар аст,
Рӯи гулаш кам занад равнақи гулзорро.

Нест ба Мисри ҷамол ҳеч чу ӯ подшаҳ,
Маскани Юсуф аз он омада дар зери чаҳ,
Таъна занад рӯи ӯ бар рухи хуршеду маҳ,
Пеши рухаш кам бувад моҳи шаби чордаҳ,
Раҳ ба даҳонаш барӣ, даҳ фиканӣ чорро!

Баски зи лаълаш шудам ғарқа ба хуни ҷигар,
Гиря кунам шамъсон ин ҳама шаб то саҳар,
Ӯст уқобу манам Туғрали беболупар,
Менакунад бар дилаш нолаи Қурбӣ асар,
Гӯши шунидан надошт нолаи беморро!

МУХАММАС

Оқибат абрӯи ту тороҷи имон карду рафт, Чашми махмурат зи мастӣ ғорати ҷон карду рафт, Каъбаи дилро рухат бигдохт, вайрон карду рафт, Шарбати лаълат халал дар шаккаристон карду рафт, Акси рухсори ту сад ойина ҳайрон карду рафт.

Баски зоҳид оварад бо тоқи абрӯят суҷуд,
Зуҳра аз тоби ҷамолат нағмаву афғон суруд,
Заррае аз партави ҳуснат ба Юсуф рӯ намуд,
Сад Зулайхо дар раҳаш афтод, рух дар хок суд
В-арна Юсуфро фироқат маҳви зиндон карду рафт.