Устод Кӯҷарзода фидоии илму таҳқиқ ҳастанд. Чунин менамояд, ки ин кас ба равияи таҳқиқоти хеш чун ба фарзандашон муносибат мекунад. Ҷустуҷӯяшон мунтазаму пайваста аст. Дер чоп мекунанд, вале хеле пухта. Андешаву ғояҳои илмиашон поя бар таҳкурсии устувори пажӯҳиш доранд. То кунун чизе чоп нашудааст, ки дигарон ин ё он андешаи илмии ӯро зери шубҳа гузошта бошад. Ӯро ҳамчун олими соҳибмактаб эътироф кардаанд.

Аз нахустин навиштаи илмии устод, ки дар рӯзномаи вилоятии «Ҳақиқати Кӯлоб» 12-уми сентябри соли 1970 ба табъ расидааст, то кунун 51 сол сипарӣ шудааст. Моҳи ноябри соли 2007 китоби дарсии «Адабиёти тоҷик»-ро барои синфи 11-ум дар ҳаҷми 400 саҳифа (бо ҳамқаламии профессор Худойназар Асозода) ба чоп расониданд. Дар ин миёна устод асарҳое офаридаанд, ки пояҳои устувори илми матншиносиро гузоштаанд, аз қабили «Нақди матн ва масъалаҳои матншиносии насри С. Айнӣ», «Нақди матни осори Садриддин Айнӣ», «Мавқеи танқиди матн дар адабиётшиносии тоҷик ва масъалаҳои матншиносии насри Садриддин Айнӣ», «Масъалаҳои матншиносии адабиёти тоҷик» ва ғайра. Дар номгӯи осори устод Кӯҷарзода такризу мақолаҳои илмӣ ҷойи намоёне доранд, бахусус навиштаҳое, ки бурду бохти эҷодиёти адибони муосирро фаро гирифтаанд. Осори адибони зиёде, аз қабили Қутбӣ Киром, Ашӯр Сафар, Алимуҳаммад Муродӣ, Ширин Бунёд, Салими Хатлонӣ, Сомеъ Одиназодаи Хатлонӣ ва дигарон аз назари устод нақди сухан шудаанд. Ҳиссае аз мақолаҳои устод ба нақди осори Мирзо Турсунзода, Муъмин Қаноат, Мирсаид Миршакар, Абдусалом Деҳотӣ, Соҳиб Tabarov, Муҳаммадҷон Шакурӣ дахл доранд, қисмате дигар бошад, ҷараёни адабии муосирро таҳлил мекунанд.

Баъдан, ӯ аз ҷараёни адабӣ ва бурду бохти адабиёти муосир комилан огоҳанд. Мунтазам такризу мақолаҳояшон оид ба эҷодиёти шоирону нависандагони ҳамзамон дар