ба он ҷое, ки рафта Умар Ҳофиз. Рафта метавонам ба он ҷо акнун бе оҳу воҳ, бе ҳасрату афсус... Умуман, ҳар кас, дар дунё, то даме мемонда ва то даме зиндагӣ мекарда, ки вазифаашро ба иҷро расонида бошад...

Қорӣ Носир дар асл бемор набуд ва ягон нишони беморӣ ҳам дар вай эҳсос намегардид ва ҳатто гӯё рӯҳи болидае дошт...

Вале чун субҳи дигари рӯзи дигар дамид, рӯҳи Қорӣ Носир бо анвори сабоҳ даромехт, ба осмон парвоз гирифт, то ба рӯҳи дурахшони гузаштагон ва азизон омезад ва як шавад ва хоса бо рӯҳи Умар Ҳофиз — бо азизтарин дӯсти ҳунарманди худаш...

...Акнун бари қабри Қорӣ Носир менавохт Мирзои Навозанда. Менавохт бо гиччаки марғибие, ки Қорӣ Носир бахшида буд бароияш як рӯз пеш аз марги худаш. Ин ҳамон гиччаки фарангӣ буд, ки бо миёнаравии Умар Ҳофиз тоҷири фарғонагӣ аз мулкҳои дур харида, оварда буд барои Қорӣ Носир...

Менавохт Мирзо бо ин гиччак.

Ва медонист, рӯҳи Қорӣ Носир амсоли рӯҳи Умар Ҳофиз фақат аз созу наво оромиву осудагӣ пайдо карда метавонад...

Ва қабри Қорӣ Носир ҳам дар бари қабри Умар Ҳофиз ҷой гирифта буд...