---

Ҳар хиёнаткорро дар пеш бошад чоҳи марг,
Об, чун гандида шуд, ҷояш даруни хандақ аст.

---

Вазну тамкин одамиро ҳусни нав меоварад,
Коҳ ки вазне надорад, бод титаш мекунад.

---

Об хоҳӣ, чоҳ бояд кофт то умқи замин,
Меравам дар худ фурӯ, то мисрае пайдо кунам.

---

Зор мегирям зи бедардии мардум ҳамчу шамъ,
Шаб чу месӯзам, ки шоми тирашон рӯшан кунам.

---

Дарду доғи зиндагӣ бар дил нишинад, бок нест,
Тирагӣ кӯтоҳ бошад аз ғубор оинаро.

---

То бигардад шир соф, аз ширполо бигзарад,
Мисраъ то воло шавад, аз мағзи дилҳо бигзарад.

---

Таън кардан бар сияҳваш нест аз рӯи адаб,
Абр чун бошад сияҳ, борони раҳмат оварад.

---

То намонам бар лабаш лабро, ҳисобӣ нест, нест,
Дар тарозу рост шуд ду палла, ҳосил муддаост,

---

Мешавад аз панди пирон суфта ақли навҷавон,
Чӯби каҷро мекунад охир, ки зарби теша рост.

---

Ҳар касе ки илм дорад, бештар фархунда аст,
Шед андар селаи нураш муқаддас баҳри мост.

---

Бо ту чун наздик мегардам, дилам гум мезанад,
Рӯшанӣ наздик бошад, хира мегардад нигаҳ.

---

Пешпо дар зиндагӣ хӯрдан далели мусбат аст,
Барнахӯрд ар об бар санге, мубарро кай шавад?