---

Ҳар бағалвокардане оғӯши гарми дӯст нест,
Шӯра аз по афканад девори дар оғӯшро.

---

Кас нагирад дасти ман дар зиндагонӣ, бок нест,
Хомаи ман дастгирам бод то поёни умр.

---

Зарбаҳои зиндагӣ охир ғурури мо шикаст,
Об дар пастӣ фарояд, нарм ҷорӣ мешавад.

---

Тифл бе модар асири лашкари ғам мешавад,
Барг агар аз шох афтад, поймолаш мекунанд.

---

Зард шуд рухсораат аз хоксориҳои ту,
Ханҷаре дар хок уфтад, оқибат зангаш занад.

---

Мард чун комил бигардад, шӯҳраташ боло шавад,
Баъди ҷасти тир овози камон пайдо шавад.

---

Дар ҳисори зиндагӣ парвоз омӯзад дилам,
Кирми пилла дар қафас болу паре пайдо кунад.

---

Мард бояд пухта гардад дар алови зиндагӣ,
Оби ноҷӯшида нӯшидан зиён меоварад.

---

Пухтаам, кай мекунад бар ман асар санги рақиб,
Хишти пухта мекунад бардошт зарби жоларо.

---

Бар муроди дил расидем аз талоши зиндагӣ,
Рӯди лойолуд соф аз шӯру исён мешавад.

---

Зардии рухсори мо ҳаргиз нишони аҷз нест,
Сайри гардун менамояд офтоби зардранг.

---

Рӯ ба пастӣ кардаӣ, хоҳам нигаҳ дорам туро,
Доштан душвор бошад дар нишебӣ шахсро.