ДОРОИ БУЗУРГ ФРАДИ МАРҒИЁНИРО ЧӢ ГУНА САРКӮБ КАРД?

Дориюши Кабир соли 522 ба ҷои Кабучияи писари Куруш ба тахти Ҳаҳоманишиён нишаста, барои саркӯбсозии ошӯби Фради марғиёнӣ Додаршиш ном сарлашкарашро сӯи Хоразм ва Марв мефиристад. Додаршиш ба Марв лашкар кашида, ошӯбро бераҳмона пахш мекунад ва 55 ҳазор ошӯбгаронро кушта, 7 ҳазори дигарро ҳамроҳи пешвои шӯришгарон Фради марғиёнӣ асир мегирад. Ошӯбҳои мардуми Порт ва сакоиҳо низ бераҳмона пахш гардида, пешвои гарданкаши сакоиҳо Скунха низ асир меафтад.

ОЁ КУРУШИ КАБИР БА ХОРАЗМ ЛАШКАР КАШИДААСТ?

Куруши Кабир баъди фатҳи Лидия ва муттаҳидсозии давлати Моду Порс тақрибан соли 545 то милод ба Осиёи Марказӣ лашкар кашида, сарзамини Хоразми кунунӣ, қисмати шарқии Порту Гиркания ва ҳудудҳои Марвро забт намуда, сипас ба сӯи Бохтару Суғд ҳаракат мекунад. Баъзе таърихнигорон мепиндоранд, ки сарзамини подшоҳи массагетҳо малика Томирис маҳз дар ҳудудҳои канории Хоразм воқеъ будааст.