Метаппадӣ не? Ӯ ба дарки баёни ҳақ, пешопеши селоварди хасу хошок омада буд. Аз ҳақталошӣ ба кӣ ҳайкал сохтаанд? Қалами муқаддас бо лавҳ дар ангуштони заифу ларзони Бобаки «бинӣ» қаламхор гашт. Мунофиқ ба ҳар курсӣ биншинад, ҳангома мехезад. Ана, маводе, ки ҳаёту мамоти чанде ба он вобаста буд, бе тамаъ рӯи чоп намебинад. Ҳарисиву рӯбоҳигарӣ бо хунаш омада, аз имтиҳони устоди дӯзахзебаш Валимади Карим аъло гузашта буд. Аз қалами номубораки гандабинӣ ҳамеша низоъ бармехест. Ӯ тарозуи ҳақнигориро бармаҳал шикаста буд. Зовути пунба бо ҷамъи дастгоҳи хадамот дар чашмони аз асари шаробхӯрӣ халтазадаи Бобак ба Худо, катаки мург тобид. Ду саҳифаи рӯзномаи ҳукуматиро — ҳайфи коғази сафед! — сиёҳнома нигошт. Мардуми ноҳия, ки собун, рӯған, матоъҳои пахтагини кӯдакона ва маводи зарури рӯзғорро бо нархи арзон аз ҳамин нуқта дармеёфтанд, ба мизондори Маҷлиси Олӣ шиква навишта, ба рӯйи доғи кунҷтакдори Бобаки «бинӣ» тамғаи маҳкумӣ заданд.

Бо рангомезии масъала ба тани якчашма рашҳа давид. Туфангдорони зархаридро назди сардабир фиристод. Муколамаи тӯлонӣ ба ҷанҷол печид. Берӯён гуфтанд, ки «ду ҳазор доллари мо дар об рафт». Бобо Пирзода пакар монд. Дар чил соли хабарнигорӣ нав мешунид порахӯрии муаллифро. Якеаш бетоқат шуд. Болои сари мӯйсафед ба танаи девор тир зад. Таъкид карданд: «То пагоҳ доллар ба соҳибаш нарасад, «Бинӣ»-ро аз рӯи замин мебардорем!» Аммо, Бобаки шумрӯ кайҳо аз қаламрав ғайб зада буд.

Абӯхайр Меъроҷиддин, шабу рӯз реҷа мекашид, ки писараш ба Амрико биравад. Ҳине дар вазорати умури хориҷа ба ҳуҷҷатҳои ҷавон ошноӣ пайдо карданд, мудири бахши мутахассисин ва робитаи байналмилал Неъмати Зафар кифт барҳам кашида, музтар монд. Ҷузвдонро канор нагузошта буд, ки аз идораи Боло сим заданд. Гӯширо бардошт. Овози дағали мардонае аз омодагии ҳуҷҷатҳои Автандили Абӯхайр мепурсид. Мудир фаҳмонд, ки бе санади лозима касеро ба хориҷи марз фиристодан ҳақ надорад. Одами «ғайбӣ» таҳдид менамуд, ки суханаш қабул набошад, тақдираш дар они воҳид ҳал хоҳад шуд. Мутахаййир монд мудир ва ноилоҷ ҳуҷҷатҳои сохтаро барои сафар омода сохт. Айни ҳол дар вазорати амнияти бехатарӣ ба вуқӯъ пайваст. Вале аз он ҷо ҳатто симаш назаданд. Охир, ба ӯ чӣ сим мезанаанд? Ҳуҷҷатҳоро рӯйрост