БОБИ 3. НАЗАРИ АКАДЕМИК Б. ҒАФУРОВ
ДОИР БА МАСЪАЛАИ ИСТИЛОИ МУҒУЛ
ВА МАФҲУМИ «ДЕҲҚОН»

3.1. Академик Б. Ғ. Ғафуров ва ташаккули мактаби илмии таърихшиносии тоҷик.
Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар асари «Чеҳраҳои монадагор»-и худ менависанд:
«Дар ташаккули ҳар як халқу миллат бузургоне ҳастанд, ки номи онҳо дар ҳеҷ давру замон аз хотираи мардум фаромўш намешавад» [15, 328]. Яке аз чунин чеҳраҳои мондагор фарзанди фарзонаи миллат, Қаҳрамони Тоҷикистон, академик Бобоҷон Ғафурович Ғафуров мебошад, ки ҳамчун ходими барҷастаи сиёсиву давлатӣ ва роҳбари аввал дар рушду пешрафти ҷумҳурӣ ҳамчун олим ва муҳаққиқ дар омўзишу тадқиқи таърихи халқи тоҷик ва ташаккули мактаби илмии таърихшиносии миллат нақши бориз гузоштааст.
Имрўз дар бузургдошти ҷашни 31-солагии Истиқлолияти давлатии Ҷумҳурии Тоҷикистон ва рушду нумўи илми тоҷик, агар мо ба роҳи тайкардаи илми таърихшиносии миллӣ назар андозем дар саргаҳи он устод Садриддин Айнӣ, академик Бобоҷон Ғафуров ва як гурўҳ шарқшиносони шинохтаро мебинем. Агар устод С.Айнӣ бо усули тадқиқ ва назару пажуҳишҳои таърихии худ дар таҳкими донишҳои таърихӣ ба илм мусоидат карда бошад, академик Б. Ғафуров бо пажуҳиш ва ҳунари волои роҳбарию ташкилотчигии худ дар саргаҳи ташаккули мактаби илмии таърихшиносии тоҷик меистад.