МАЪЛУМОТҲОИ ЭТНОГРАФӢ

Калимаи «этнография» маънои «халқшиносӣ», «тавсифи халқҳо»-ро дорад. Ин илмест, ки ҳайат, пайдоиш ва ҷойгиршавии халқҳои дунёро меомӯзад.

Дар маълумотҳои этнографии мо дар бораи пайдоиши халқ: кай ва аз кадом қабилаҳо пайдо шудани он, кай ва аз куҷо омадани он ба замине, ки ҳоло зиндагӣ мекунад, шарҳи мухтасар дода мешавад. Забоншиносии муосир забонҳоро ба гурӯҳҳо ва гурӯҳҳоро ба оилаҳо ҷудо мекунад. Оилаи забонҳои асосӣ, ки забонҳои халқҳои мамлакатҳои мо ба он тааллуқ доранд, ҳиндуаврупоӣ ва олтой мебошанд. Оилаи ҳиндуаврупоӣ ба чанд гурӯҳ ҷудо мешавад, ки асосиаш барои мо гурӯҳи славянӣ мебошад. Оилаи забонҳои олтой ба гурӯҳҳои туркӣ, муғулӣ ва тунгусиву манҷурӣ ҷудо мешавад.

Дар поён мо дар бораи хат, адабиёт, фолклор, инчунин дар бораи машғулиятҳои асосӣ ва шароити ҷуғрофии онҳо маълумоти мухтасар медиҳем.

РУСҲО

Дар дунё, эҳтимол, одаме нест, ки дар бораи русҳо чизе нашунида бошад. Соли 1970 русҳо 130 миллионро ташкил медоданд1. Ҳоло ин рақамҳо хеле зиёд шудаанд.

Гузаштагони русҳо — қабилаҳои қадимаи славянӣ — дар аввали эраи мо дар ҳудудҳои аз дарёи Висла то Днепр зиндагӣ мекарданд. Давлати қадимаи рус — Руси Киев дар асри IX ташкил ёфтааст. Дар муддати мавҷудияти Руси Киев (IX-XII) қабилаҳои славянӣ ба халқияти қадимаи русӣ муттаҳид шуданд, ки барои ташаккулёбии се халқи бародар — рус, украин ва белоруsl асос шудааст.

1 Дар ин ҷо ва минбаъд — маълумотҳои барӯйхатгирии Умумииттифоқии аҳолӣ, соли 1970.