ДЕҲИ УРМЕТАН
Деҳи Урметан зи шеър обистан аст,
Зодгоҳи шоирон Урметан аст.

Зодгоҳи Қутбии фархундапай,
Бо Зарафшон шеъри ӯ ҳамшеван аст.

Деҳаи Субҳони Туйғун, чеҳрааш
То ҳанӯз андар дили мо рӯшан аст.

Деҳаи Мирзои Маҳмуд, он зариф,
К-аз латофатҳош табъам гулшан аст.

Меҳани дорост, чун Доро Наҷот
Дар сухан дороии ин меҳан аст.

Деҳае, ки Озарахши табъи ӯ
Дар самои шеъри мо нурафкан аст.

Деҳаи он Шоҳрух Мирзои мо,
Нек инсоне, ки худ як меҳан аст.

Пайки нав бо Ховар Абдулҳай расад, –
К-ӯ умеди тозаи Урметан аст.

Реша дар об аст ин ҷо нахли шеър,
Эй басо нахле, ки андар рустан аст. –

Аз матои родмардиву шараф
Бар тани фарзанди ӯ пероҳан аст.

Деҳае, ки хайру эҳсону сахо
Бар ҷавонмардони некаш маъман аст.

Дар бараш рӯди Зарафшон зарфишон,
Зар таҳи по, зевараш дар доман аст.

Аз ҳама доротарин дороияш
Хайрхоҳиву футувват дар тан аст.

Меҳмонро мекунад ӯ тоҷи сар,
Ҳар кӣ ояд, гӯяд: ин деҳи ман аст!
1.09.2016