Дар чакан, дар атласу адрас мунаққаш
Нури чашми модари ҷон аст ин ҷо,
Дар нигоришҳои пурмаънои ҳар ранг
Ҷилваи сад аср пинҳон аст ин ҷо,
Тоҷикистон аст ин ҷо!

Фазлу одобу футувват
Дар паси андеша ҷавлон мезананд,
Ҳурмату некиву эҳсон
Амри виҷдон аст ин ҷо,
Тоҷикистон аст ин ҷо!

Ҳикмати сад қарни мозӣ
Дар нигоҳи дидаи пире дурахшон аст ин ҷо,
Сад китоби панду андарз
Дар лаби хомуши пирон аст ин ҷо.
Тоҷикистон аст ин ҷо,

Сурату рамзи Нишони давлатӣ Дар сари дастони модар тифли хандон аст ин ҷо!
В-он суруди бегазанди миллии ӯ Аллаҳои модари ҷон аст ин ҷо, Тоҷикистон аст ин ҷо!

Дар нафасҳои фасеҳи бод
Накҳати боғу гулистон аст ин ҷо!
Охирин як пораи нон
Ризқи меҳмон аст ин ҷо!
Тоҷикистон аст ин ҷо!

Нусрату меҳру муҳаббат дар нигоҳи одамон
Ошкорову дурахшон аст ин ҷо,
Дарду ҳасрат, ранҷҳои зиндагӣ,
Зери дандон ин ҷо!
Тоҷикистон аст ин ҷо!