Ҳама узви комсомол иҷозат диҳанд.

– Агарчи ба мо чандон бовар накарда, аз ҳамон экскаваторҳо кӯҳнатаринашро «муносиб» донистанд, ҳарчанд дар бадали ду-се рӯз ягон қисми он мешикаст, ё аз кор мебаромад, маҳсули меҳнатамон бад набуд. Зеро аз вақти муқаррарӣ ду-се соат зиёдтар меҷунбидем. Шармсор нашавем гуфта, то ба бордони мошинҳо баробари дигар экскаваторчиён, ё аз онҳо ҳам бештар хоку санг нарезем, хона ба хона намерафтем...

Ҳар қадар баэҳтиёт муносибат мекарданд, экскаватор кӯҳна ки буд, дер тоб оварда натавониста, як рӯзи Худо тамоман аз кор баромад.

– Ба ҳалво гуфтан даҳон ширин намешавад. Баҳузур озмудед – осон набудааст алоҳида чунбидан. Ҳа-а... Натиҷаи гарданшахию шумо ҳамин шуд, ки муфт аз як экскаватор мондед. Шумо – комсомолҷавонони ба ном серғайрат аз саф баровардед он механизми дар сохтмон ниҳоят зарурриро. Дониста бошед, ки ақли солим ҳам дар сари кас ба синну сол пайдо мешавад. Ҳа-а, бисёр аз худ наравед дигар.

Ба чунин талху пичинг онҳоро аз нав дар байни дастаҳо тақсим карданд.

Файзулло чӣ? – пайваста дили рафиқонашро мебардошт. Худаш низ рӯҳафтода намешуд. Ва хандида, мегуфт:

– Ғам нахӯред, дӯстонам. Ҳоло нишон медиҳем, ки мо бачаи ҷайра нестем, мустақил кор карда ҳам метавонем. Гап дар сари он экскаватор бошад, худатон нағз медонед, – вай ҳаргиз ба айби ману шумо нашикастааст. Ҳамин тавр...

...Женя Батурин ҳикояташро идома медиҳад:

– Хислати аҷиб дорад Файзулло, – рамзфаҳм, умуман ҳушёри ҳушёр. Рӯзе хабар овард,