Ку бинем, ин гирудор ба чӣ меанҷомад гуфта, падараш намонд. Худам ҳам розӣ набудам. Орзу дошт, ки ба духтурӣ мехонад. Лекин... - лаб мегазад вай, - он ҷанги хонумонсӯз на фақат бисёр одамони бегуноҳро ба ҳалокат расонд, балки хеле аз ормонҳои неки мардумро зеру забар кард.

Ҳеҷ қисса не, оча, - тасаллӣ медиҳам ман. - Рафта-рафта об ба лаби ҷӯй баробар мешавад. Аз хондагиҳо яктааш ман бошам, имрӯз ана... мисли Хуросонам, сангу хок мекашам. Кор дар ҳама ҷо кор аст. Муҳиммаш - нони ҳалол хӯрдан...

Худоро шукр, ба меҳнати бародархондат чун дар кулли умрамон нони ҳалол мехӯрем. Аммо кас агар хонад, гапи дигар... Масалан, ҷоҳил намешавад.

Хуросон ҳаргиз ҷоҳил не.

Ман умуман мегӯям.

Фикратон, албатта, ҷон дорад. Вале ҷоҳил набудан аз худи одам ҳам вобаста.

Шояд... - хаёлолуд мад мекашад Бибирухсора. - Қиссаамон нотамом монд. Аз паҳлавони мо Шамшер гап сар карда будем.

Бале, - мегӯям ман то алҳол пушаймон, ки аламҳои ӯ тоза мешаванд.

Тирамоҳи соли наваду чор падари Хуросон дар ҷои кораш як пиёла чои хунук нӯшида, ду шабонарӯзи дароз дар беморхонаи ноҳия парто-парто карда, бо сад азоб аз дунё гузашт. Раҳматӣ шуд. Ба вабо печидааст, - хулоса бароварданд табибон. Аммо миш-миши гирду атроф дигар буд. Мегуфтанд, ки заҳр хӯрдааст, доруи қаттол додаанд ба вай, навъе аз доруи ҳашарот... Ҳақиқати ҳолро худи Худо медонад гуф-