Ман ёди туву аммо ба ёди дигарӣ,
Дилсўхтааму расӣ ба доди дигаре.
Ё Раб аз ин панҷара озодам кун.
Ман низ бошам ба суроғи дигаре.

---

Ишқи ман на ишқи инҷаҳонист бидон,
Не лағву дурўғу моли фонист бидон.
Ин ишқи муназзаҳу Илоҳист яқин,
Ин сарвати қудс пурмаонист бидон.

---

Як лаҳза дилам зи ёди ту берун нест,
Мисли дили ман дили касе пурхун нест.
Ёди ту маро ба қудс мепайвандад,
Ин дил ба ёди хокиҳо маҷнун нест.

---

Ишқи ту маро то дами марг ҳамроҳ аст,
Аз сўхтани ман фақат Худо огоҳ аст.
Айбам ту макун, ки ин ҳама хости Худост,
Эй дўст бибахшо, ки дилам гумроҳ аст.

---

Пир гаштаму ишқи ту ҷавон мегардад,
Сармояи умри ҷовидон мегардад.
Исмат ба китоби шеър сабт аст мудом,
Он даст ба дасти мардумон мегардад.

---

Ин қадр бихоҳам, ки зи ёдат бибарам,
Дар ивази он ишқи наверо бихарам.
Ин панҷараи ишқ раҳоям накунад,
Чун мурғаки дар гарав беболу парам.

---