Зинҳор магард паси ҷаҳони гузарон,
Гаҳ оташи сузандаву гаҳ баҳри дамон.
Хилват нишин қаноате пеша гузин,
Шукреву сипос ҳарчӣ Худо дод бар он.

---

Ман шефтаи он диле ғами ёр хурад,
Заҳрро ба ёр нуш ба ағёр хурад.
Ман бандаи он диле чу дарёст бузург,
Аз дўст нагусаст гарчи озор хурад.

---

Додрас ба оҳи ман Худояст Худо,
Ҳам пушту паноҳи ман Худояст Худо .
Аз хешу табор надорам умеду тамаъ ,
Танҳо такягоҳи ман Худояст Худо .

---

Ин мактаби ишқ шоирӣ омўхт маро,
Ин сарвати ишқ шокирӣ омўхт маро.
Дар ишқи ту аз одамиён нанге нест,
Ин талхии ишқ собирӣ омўхт маро.

---

То бо ту будан ба ёди ту ширин аст,
Дунёи хаёл ба ёди ту рангин аст.
Носудагии ёди ту ороми дил аст,
Бе ёди ту як лаҳза басе сангин аст.

---

Ин дил, ки зи ишқи ту басе афсурдаст,
Як лаҳза зи ёди ишқи ту носудаст.
Арзандаи ишқ наяст ҳар ончӣ фонист,
Ин ишқ яқин ишқи Илоҳӣ будаст.

---