Қазоро бин, ки бо ман дар ситез аст,
Зи ман толеъи хуш андар гурез аст.
Куҷо рафтам куҷо хестам нишастам,
Ба сар борони кулфат рез-рез аст.

---

Ту эй дида чунин пурнам чароӣ?
Ту эй қалбам чунин пурғам чароӣ?
Ту эй сар эй сари савдоии ман,
Чунин дар фикри бешу кам чароӣ?

---

Бо ман тақдир аҷаб рангу ба ранг аст,
Мудом ғам улфату шодӣ ба ҷанг аст.
Намедонам ба ки созам шикоят,
Ки ҳарҷо бингарам дилҳо чу санг аст.

---

Оқибати одами ҳамин асту ҳамин,
Манзили мудомиаш бувад зери замин.
Эй бехабарон зи марг ғофил машавед,
Ҳар як ҳадафед аҷал гирифтааст камин.

---

Дило дидӣ ки дунё бевафояст,
Ба ҳар суе назар кардӣ ҷафояст.
Дар ин кулфатсаро ҷуз хайру некӣ,
Макун, ки кори дунё бебақояст.

---

Эй бандаи нодон зи куҷо медонӣ,
Тақдири азал хостаи яздонӣ.
Аз ғам мафиган хешу зи шод шод мабош,
Дар бешу ками ҳаёт моҳро монӣ.

---