Парҳез
Зи қавми ҷоҳилон парҳез писарҷон,
Зи ҷамъи фосиқон бигрез писарҷон.
Агар бо моҳ биншини ту моҳӣ,
Агар бо дег биншини сиёҳӣ.
Ба дунболи худоғофил, ки рафтӣ,
Ба чоҳи ҷаҳли ў ночор биафтӣ.
Ба оби соф рў шўй то тавонӣ,
Ба доноён бигир хуй то тавонӣ.
Чу об огандаи лой асту хошок,
Даҳонатро макун олуди нопок.
Ба он пайванд, ки бошад дўсти ҷонӣ,
Аз он бигсил, ки бошад ў зиёнӣ.
Ба он биншин, ки ёби з-он фўзунӣ,
Аз он бигрез, ки ёби з-он нагунӣ.
Ба илму уламо пайваста бошӣ,
Худо хоҳад зи зулмат раста бошӣ.
Ҷаҳолатпешаро чоҳ аст дар пеш,
Зи ҳамроҳӣ ба ў андешу андеш.
Аз ин даҳри пурисён ҷуй канорӣ,
Вагарна туъмае бар мору норӣ.
Марти соли 1995