Дӯстӣ бо мардуми доно накӯст,
Душмани доно беҳ аз нодони дӯст.

ДОСТОНИ МӮСО ВА ГӮСОЛАПАРАСТ

Ҳазрати Мӯсо (а) пайғамбар буд ва қавми худро ба парастиши Худо даъват мекард. Бо ин ки барои раҳнамоии онҳо мекӯшид, пайравони ӯ ҳар рӯз баҳонае пайдо мекарданд ва сар аз фармони ӯ мепечиданд. Як рӯзи дигар гуфтанд:
– Агар Худо тавоност, чаро дасти Фиръавн, подшоҳи Мисрро, ки моро озор медиҳад, аз сари мо кӯтоҳ намекунад?
Як рӯзи дигар ба ӯ гуфтанд:
– Аз Худо бихоҳ, дар ин биёбони беобу алаф барои мо аз осмон мошу мурғи бирён бифиристад.
Гоҳе чашмаи оби равон металабиданд. Хулоса, ҳар дам бо баҳонае Худованд худоии худро ба онҳо собит бояд мекард.
Мӯсо (а) бо тоқат ба суханони онҳо гӯш медоду Худованд ҳам хоҳиши ӯро мепазируфт, то ин ки Мӯсо (а) ба фармони Худо ба кӯҳи Тур рафт. Дар набудани ӯ марди ҷодугар барои ин ки қавми баҳонагири бани Исроилро гумроҳ кунад, аз зари тоза гӯсолае сохт, ки аз даҳони ӯ садое берун меомад.
Ба мардуми Исроил гуфт: «Ин худои шумост ва бояд ӯро парастед». Он мардуми нодон ҳам бовар карданд ва Худои ягонаи Мӯсоро фаромӯш карда, ба дунболи Сомирии ҷодугар афтоданд.
Мӯсо аз кӯҳи Тур баргашт ва қавми худро гумроҳ дид. Ба онҳо гуфт:
– Аз рӯзе, ки ман аз сӯйи Худо ба пайғамбарӣ баргузида шудам, ҳар чӣ хостед, кардам, то сипоҳи Фиръавн фиреб бихӯранду ғарқ шаванд. Чил сол Худованд барои шумо аз осмон хӯрок фиристод, ки онҳоро хӯрдед ва аз тавоноии Ӯ огоҳ шудед! Дар биёбон чашмаи об ҷорӣ кардам, то бинӯшеду Худоро сипос доред. Ҳамин ки чанд рӯз дур шудам, ҳама неъматҳои Парвардигорро фаромӯш кардед ва фиреби ҷодугарро хӯрдед. Ба ҷойи Худои бузург ба парастиши гӯсолаи заррин пардохтед? Чаро аз ӯ муъҷиза намехоҳед? Чаро намегӯед, ки дарёро хушк кунад, чашмасор падид оварад ва ғизо аз осмон биёварад? Мӯсо (а) намедонист, ки:

Ботилонро чӣ рабояд? Ботилӣ,
Отилонро чӣ хуш ояд? Отилӣ.

Нодон рӯзро мебинаду мункири офтоб мешавад.

ДОСТОНИ ҶОЛИНУС ВА ДЕВОНА

Ҳакими маъруфи юнонӣ Ҷолинус рӯзе ба шогирдони худ фармуд, ки барои ӯ аз дорухона доруе биёваранд. Шогирдон чун номи он доруро шуниданд, дар шигифт шуданд, зеро он дору барои дармони девонагон ба кор мерафт. Пас аз устод пурсиданд: