Ҳазор сурат ҳар дам зи нури хуршедат
Барояд аз дили поку намояд эҳсонат.
Даруни хеш агар хоҳадат дили нопок,
Зи аблаҳию харӣ мекашад ба зиндонат.
На ҳеч оқил бифребадат ба ҳилати ақл,
На пойбанд кунад ҷоҳи ҳеч султонат.
Туро, ки дар ду ҷаҳон менагунҷӣ аз азамат,
Абӯҳурайра гумон чун барад дар анбонат?
Ба ҳар ғазал, ки сароям туро зи пардаи шеър
Дилам зи парда ситонад ҳазор чандонат.
Дилам кӣ бошаду ман кистам, ситоиш чист?
Валек ҷонро гулшан кунам ба райҳонат.
Биё ту – мафхари офоқ, Шамси Табрезӣ,
Ки ту ғариб маҳию ғариб арконат.

Ба шоҳи ниҳонӣ расидӣ, ки нӯшат,
Майи осмонӣ чашидӣ, ки нӯшат.
Нигори Хутанро, ҳаёти чаманро
Миёни гулистон кашидӣ, ки нӯшат.
Аё ҷони дилбар, аё ҷумла шаккар,
Чӣ моҳӣ, чӣ шоҳӣ, чӣ идӣ, ки нӯшат.
Зи мастон саломат, зи риндон паёмат,
Ки қуфли тарабро калидӣ, ки нӯшат.
Дило, хуш гузидӣ ғами Шамси Табрез,
Гузида касеро гузидӣ, ки нӯшат!

Агар мар туро сулҳ оҳанг нест,
Маро бо ту, ай ҷон, сари ҷанг нест.
Ту дар ҷанг ойӣ, равам ман ба сулҳ,
Худои ҷаҳонро ҷаҳон танг нест.
Ҷаҳонест ҷангу ҷаҳонест сулҳ,
Ҷаҳони маъонӣ ба фарсанг нест.
Ҳам обу ҳам оташ бародар буданд,
Бибин, асли ҳар ду ба ҷуз санг нест.
Ки бе ин ду олам надорад низом,
Агар Рум хуб аст, бе Занг нест.
Маро ақл сад бор пайғом дод,
Хамуш кун, ки фахр аст он, нанг нест.

Андаро, айш бе ту шодон нест,
Кист, к-ӯ бандаи ту аз ҷон нест.
Ай ту дар ҷон чу ҷони мо дар тан,
Сахт пинҳон, валек осон нест.
Даст бар ҳар куҷо ниҳӣ, ҷон аст,
Даст бар ҷон ниҳодан осон нест.
Ҷон, ки софӣ шудаст дар қолаб,
Ҷуз ки ойинадори ҷонон нест.
Ҷамъ шуд офтобу маҳ ин дам,
Вақти афсонаи парешон нест.
Мастӣ афзун шудасту метарсам,
К-ин суханро маҷоли ҷавлон нест.
Даст неҳ бар даҳони ман, то ман
Он нагӯям, чу гуфтро он нест.

Хез, ки имрӯз ҷаҳон они мост,
Ҷону ҷаҳон соқию меҳмони мост.
Дар дилу дар дидаи деву парӣ
Дабдабаи фарри Сулаймони мост.
Рустами Дастону ҳазорон чу ӯ
Бандаву бозичаи дастони мост.
Бас набувад Мисри маро ин шараф,
Ин ки шаҳаш Юсуфи Канъони мост.
Хез, ки фармондиҳи ҷону ҷаҳон
Аз карам имрӯз ба фармони мост.
Зуҳраву маҳ дафзани шодии мост,
Булбули ҷон масти гулистони мост.
Косаи азроқ паёпай шудаст,
Кисаи иқбол ҳарамдони мост.